لاہور: کسان اتحاد پاکستان نے منگل کو وزیر قانون پنجاب راجہ بشارت سے کامیاب مذاکرات کے بعد ہڑتال ختم کرنے کا اعلان کر دیا۔
کسان اتحاد نے گندم اور گنے کی فصل کی امدادی قیمتوں میں اضافے کے خلاف (آج) بدھ کو پنجاب اسمبلی کے باہر احتجاج کرنے کا اعلان کیا تھا۔
کسان اتحاد کے چیئرمین محمد انور نے وزیر قانون پنجاب سے ملاقات میں کسانوں کو درپیش مسائل اور مطالبات پر روشنی ڈالی۔
اس موقع پر خطاب کرتے ہوئے راجہ بشارت نے کہا کہ کسانوں کی سہولت موجودہ حکومت کے اولین مقاصد میں شامل ہے اور وزیر اعظم عمران خان اور وزیر اعلیٰ پنجاب عثمان بزدار کی جانب سے جاری کردہ گائیڈ لائنز پر کسانوں کو ریلیف فراہم کرنے کے لیے اقدامات کیے جا رہے ہیں۔
انہوں نے کاشتکاروں کو گندم، کپاس اور چینی کی فصلوں پر ان کے تحفظات کے مکمل ازالے اور ہر قسم کی حمایت کا یقین دلایا۔
واضح رہے کہ اقتصادی رابطہ کمیٹی (ای سی سی) نے حال ہی میں اگلے سال کی فصل کے لیے گندم کی امدادی قیمت 1600 روپے مقرر کی تھی جب کہ سندھ کابینہ نے 2000 روپے فی 40 کلو گرام مقرر کی تھی۔
پنجاب اور بلوچستان نے وفاقی حکومت سے گندم کی خریداری کی زیادہ سے زیادہ امدادی قیمت 1700 روپے فی 40 کلوگرام مقرر کرنے کی سفارش کی تھی جب کہ خیبر پختونخوا نے 1880 روپے فی 40 کلو گرام کی تجویز دی تھی۔